Бидејќи Брус Вилис не е во форма во последно време, членовите на Заедницата на истражувачи на вселената повикаа на изградба на глобална мрежа за заштита од удари на небесни тела, кои само во близина на нашата планета во овој момент бројат околу 6.000.
Бројот на откриени и опишани објекти во вселената околу Земјата до 2020-та година драматично ќе се зголеми, а проценките велат дека може да се искачи и на еден милион. Токму затоа, научниците сугерираат на изградба на светска мрежа за истражување, информирање и одбрана од вселенски објекти под водство на Обединетите Нации.
Зголемувањето на бројот на препознаени потенцијално опасни небесни тела не значи зголемување на веројатноста за нивен удар на нашата планета, но значи дека треба да се зголемат мерките на претпазливост, за да не дојде до евентуална катастрофа.
"Доколку само ја погледнеме Месечината, на која поради недостатокот на атмосфера подобро се конзервираат кратерите од ударите, ќе ни стане јасно дека опасноста од астероидите е актуелна. Впрочем, самата историја на планетата Земја укажува на бројни докази за слични појави", изјави Расел Швајкарт, претседател на Меѓународната група за намалување на опасноста од астероидите.
Со развојот на науката и технологијата постојат многу можности за предвидување и одбрана од вакви потенцијални армагедонски случувања, тврдат научниците, кои ургираат на глобална согласна акција за да се искористат можностите, доколку е потребно. Стручњаците целат кон создавање на мрежи кои би собирале и проценувале информации од различни научни установи и би формирале мерки на заштита.
Според нив, потенцијален судир на некое небесно тело со нашата планета може да се предвиди 10 до 15 години однапред, што по нивното мислење е сосема доволно време за подготовка на соодветни противмерки, како на пример, промена на траекторијата на телото со силен противудар.
Научниците предупредуваат дека причина за алармот не е нивната фасцинираност од филмот "Армагедон" по 127-ми пат - туку, потенцијалната опасност која може да се случи во иднина. Најдобро да се спречи....кога, неможе да се лечи.